وجهت نور الخطيب، ابنة الكابتن محمود الخطيب رئيس النادي الأهلي رسالة لمنتقدي والدها عقب خسارة الأهلي من بيراميدز في بطولة دوري نايل. 

وكان الأهلي خسر من فريق بيراميدز في المباراة التي جمعتهما ضمن لقاءات الجولة الرابعة للمرحلة الثانية لبطولة دوري نايل، مجموعة حسم بطل الدوري، بثلاثة أهداف دون رد. 

وكتبت نور الخطيب عبر حسابها على منصة التواصل الاجتماعي “فيس بوك”: “ليه محمود الخطيب؟ اترددت كتير قبل ما اكتب اي حاجة علشان اتعودت اسكت وقت ما السكوت كان اصعب اختيار..مواقف واختبارات كتير عدي بيهم محمود الخطيب اتعودنا نحترم اختلاف الناس اتعودنا نتجاوز عن إساءات كتير، وال كان دايمًا بيهون علينا إن في الآخر ولا موقف ولا أزمة واحدة عدت إلا ربنا الحمد لله انصفه فيها وكبره وزوده وكرمنا معاه …ولا موقف دافع فيه عن نفسه ولا موقف سمح لحد حواليه يستنكر مواقف الناس وزعلها ولا مره ضعف ولا مره غلط ولا مره برر…برغم إن دايمًا وفي كل المواقف ال عدت، ال متقالش كان ومازال اكتر بكتير من أي حاجة اتقالت”.

وأضافت: “المشكلة مبقتش كورة المشكلة بقت نفوس قاسية وظالمة وبتستسهل الغلط والظلم ونفوس مختلط عليها النقد والتجريح ونفوس بتخاف تقول كلمة حق وبتخاف من الناس من غير اعتبار لرب العالمين ال مطلع علي كل حاجة…المشكلة إن ال زي محمود الخطيب قليلين مش ممكن يخسروا نفسهم ولا يغيروا طريقهم مهما اتسد.. بس ربنا دايمًا بيوجدلهم طريق تلاقي فيه حد مش خايف يمشي عكس التيار، حد سوي يقول كلمة حق، حد يسند وحد يطبطب وحد يوقف دايرة الظلم والتعدي والتجني من غير دراية حقيقية…”.

وأنهت: “و اخيرًا كل يوم باجاوب علي نفس السؤال: ليه محمود الخطيب…ليه وازاي اتغيرت ملامحه ليه اتحمل جسمه وشالت روحه فوق طاقتها…ليه اخلاقه بتُختبر كل يوم في الوقت ال كل حاجة فيه بقت مستباحة وكل كلمة وكل حُكم بقي بيطلع بسهولة حتي لو الواحد مش عارف اي حاجة…و اكتشفت إن علشان هو يقدر يستحمل ويشيل شيلة بعدد سنين طويلة ومواقف كان ممكن تهد أي حد..اختار هو يثبت ويشيل وإن تناسي الجميع..في الآخر النادي الأهلي هايفضل الأعظم مهما حصل ومهما اتغيرت الاسامي وهايفضل محمود الخطيب شخصية يقف التاريخ عندها طول العمر..”.