أنا معايا تقريرين في يومين ورا بعض  من شركة سيتروين نفسها  عن عربية إشتريتها  زيرو  من الوكيل مباشرة .
الأول بيقول أن العربية مش فابريكا و مرشوشة كلها و حالتها بؤس
و التاني بعدها بيوم بيقول  العربية فابريكا و حلوة و زي الفل 
و الإتنين من مراكز الصيانة الرسميه للوكيل " مجموعة القصراوي"  بس فرعين مختلفين
أصدق أنا مين بقي؟؟؟؟  
اللي حصل بإختصار إني إكتشفت بالصدفة إن العربية اللي إشتريناها  علي أنها زيرو و فابريكا من الوكيل الرسمي لسيتروين  " القصراوي وكيل سيتروين و جيتور و أفاتار و جاك "  مش فابريكا و لا حاجة و مرشوشة كلها بالسقف و الكبوت و الشنطة و كل حاجة ما عدا بابين. "طبعا العربية في الفترة دي من ساعة ما تم الشراء من سنتين  تقريبا في متابعة منتظمة مع التوكيل الرسمي" و كل التقرير بتاعتهم بتطلع انها بحالة الفابريكا
طبعا ما صدقتش .. حجزنا عادي جدا كشف في مركز الصيانة الرسمي لسيتروين و إحنا متأكدين ان هيطلع فيه حاجه غلط   لكن للأسف تقرير مركز الصيانة الرسمي طلع التقرير الأول  بيأكد ان العربية مرشوشة  كلها ما عدا نفس البابين
فا كلمناهم و حكينا اللي حصل و طبعا قالوا أن ده كلام فارغ   وطلبوا يشوفوا العربية تاني  و فعلا العربية راحت بعدها بيوم عمل عشان الكشف الأول كان يوم خميس .
تفتكروا إيه اللي حصل؟
الكشف "متصور فيديو" طلع العربية كلها مرشوشه ماعدا نفس البابين   و مع ذلك رفضوا يطلعوا تقرير باللي طلع في الكشف و طلعوا تقرير  بإن العربية فابريكا بالكامل و مفيهاش خربوش يعني عكس التقرير اللي من عندهم برده قبلها بيوم  "نسيوا غالبا إنهم طلعوا تقرير بالعكس قبلها بيوم"    و قالوا ما نقدرش نؤكد حاجة زي كده في تقرير رسمي  حتي لو الكشف بيقول كده عشان ده بيبقي عيب في البوية من الصناعة و إن ده بيحصل عادي و خصوصا في العربيات اللي تم دهانها في مصنع المنشأ يوم إتنين عشان العمال و المهندسين بيكونوا سهرانين و كده يوم الأحد عشان  أجازتهم و بيجوا يوم الإتنين مش مركزين. 
طبعا هما إكتشفوا الغلطة اللي حصلت بإصدار تقريرين عكس بعض في يومين ورا بعض و أن كده بقي مستحيل حتي لو إتنزنقوا يقدروا يقولوا بعد التقرير التاني ده أن العميل هو اللي رشها   فا قرروا يلموا الموضوع. 
طب إيه الحل اللي هيلموا به الموضوع ؟
قالوا أن محدش هيعرف يبيع العربية دي في يوم من الأيام لأن أي حد  هيكشف عليها هتطلع مش فابريكا و مرشوشة كلها ماعدا نفس البابين فإحنا بقي جدعنة مننا عشان خاطرك هنشتريها منك بسعرها المستعمل النهارده علي وضعها بس ما تكتبش أي حاجة عن الموضوع ده.  " و ولا من شاف و لا من دري "
طبعا  تم إبلاغ جهاز حماية المستهلك برقم  
582847  و اللي بشوف انه  حقيقي من انضف و اقوي  المؤسسات  المصرية    و تم عمل كل الإجراءات القانونية  بس مش ده بس الموضوع.
الموضوع اللي أكيد يهمنا كلنا  أن  العبث ده يوصل لكل الناس عشان بعد كده يكشفوا علي العربيات الزيرو حتي لو من الوكيل مباشرة ..
رامى السكرى 
كاتب صحفي ومنتج فنى