الصبح صحيت م الموت

على صوت

مش مسموع

عصفور بيفرهد م الجوع

فى الشباك اللى قصادى

طالب حبة ميه

لقمة 

متحنية بحنية

طلبانى أهادى

كلمه تطيب وتدادى

مش م النوع المشحوت

أنا زيك موجوع

منقوع

فى القهوه إللى قبالى

و منكوت

بقالى ٦٠ عام

وسبع تيام 

وست ليالى

ساكن تحت الضغط العالى

حطيت صبارة قدام باب شقتنا

بعد يومين وحشتنا

أكلوها ولاد الكلب

ولا مزع قلب القلب

غير لما رصاصتك نشتنا

يا ليالى الكرب

الأم وماتت على جنب

تركت على عتبة بابى 

الست كلاب دول.. أحبابى

وأنا صرت الأب

وكل عيال الفصل عيالى

كان نفسى أطلع أستاذ

وعلامى للغصة ملاذ

وأربى علما وأفذاذ

واهرب من حالك حالى