الممكن واللى مش ممكن

المصرى اليوم 0 تعليق ارسل طباعة تبليغ حذف

اشترك لتصلك أهم الأخبار

■ الممكن.. إنك تحافظ على سلامة صحتك بالمتابعة الدورية.. واللى مش ممكن.. إنك تكون موسوس تجاه كل ما يحيط بك.

■ الممكن.. إنك تفك شوية وتضحك حبتين.. واللى مش ممكن.. إنك تكون ساخر طول الوقت.

■ الممكن.. إنك تمد يد العون لمن يحتاج.. واللى مش ممكن.. إنك تتحول إلى جمعية لرعاية المحتاجين.

■ الممكن.. إنك تعترض بأدب وترفض بأخلاق.. واللى مش ممكن.. إنك تستعرض عضلاتك وتضرب فوق وتحت الحزام.

■ الممكن.. إنك تتصدر المشهد فى المحافل والمناسبات.. واللى مش ممكن.. إنك وقت الجد تتبخر.

■ الممكن.. إنك تسأل وتفهم لحد ما تتطمن.. واللى مش ممكن.. إنك تسلم ودنك لمهاترات ضالة.

■ الممكن.. إنك تفصل شحن دماغك بين الحين والآخر.. واللى مش ممكن.. إنك تكون مُغيب وغائب فى آن واحد.

■ الممكن.. إنك تتمسك بقناعاتك وتؤمن بمعتقداتك.. واللى مش ممكن.. إنك تفرض علمك وإيمانك بأقصى جهل.

■ الممكن.. إنك تراقب وتحلل مجريات الأمور.. واللى مش ممكن.. إنك تفسرها حسب أهواءك.

■ الممكن.. إنك تغامر بدون تردد وتنافس بكل قوة.. واللى مش ممكن.. هو أن يتم هذا بلا شرف وبلا ضمير.

■ الممكن.. إنك تخطئ وتعاود المحاولة من جديد.. واللى مش ممكن.. هو إنك تفتى وأنت لا تفقه شيئًا.

■ الممكن.. إنك تسترزق وتتصيد الفرص الآتية فى طريقك.. واللى مش ممكن.. إنك تستغل وتتاجر بالطول والعرض.

■ الممكن.. إنك تلقى اللوم على البخت المايل والحظ العاثر.. واللى مش ممكن.. إنك تهمل وتستهر وتتواكل فى السعى والاجتهاد.

■ الممكن.. إنك ترى وتسمع وتتكلم بحرية وشجاعة.. واللى مش ممكن.. إنك تصدر أحكامًا جزافية دون التأكد.

■ الممكن.. إنك تحلم وتخطط وتنفذ وتحصد.. واللى مش ممكن.. إنك تهدر وتهدم وتتآمر وتخون؟

■ الممكن.. إنك تلتمس الأعذار وتصفح وتسامح فى حقك.. واللى مش ممكن.. إنك تسقط فى دائرة الانتقام التى لا نهاية لها.

■ الممكن.. إنك تغير على روحك وتدافع عن وجودك.. واللى مش ممكن.. إنك تحقد على غيرك وتتمنى زواله.

■ الممكن.. إنك تحب وتذوب عشقًا فى الآخر.. واللى مش ممكن.. إنك فى سبيل ذلك تتخلى عن كرامتك وتتنازل عن قيمتك.

■ الممكن.. إنك تعمل الواجب وتراعى الأصول وتلبى النداء وتخدم القريب والغريب.. واللى مش ممكن.. إنك تفعلها على حساب نفسك وفوق طاقتك وخارج إرادتك.

■ الممكن.. إنك تحبط وتتراجع وتتوارى وتحتجب فترة زمنية.. واللى مش ممكن.. إنك تفقد الأمل وتستسلم لليأس وتعتزل الحياة وأنت على قيدها.

■ الممكن.. إنك تغضب وتثور وتنهى علاقات وتقلب صفحات.. واللى مش ممكن.. إنك تتهور فى اتخاذ قرارات تأتى عليك بالخسارة.

■ الممكن.. إنك تتطالب بالتكافؤ فى الفرص والعدالة فى التوزيع والمساواة فى الحقوق.. واللى مش ممكن.. إنك تتسم بالفردية والعنصرية والإقصاء.

■ الممكن.. إنك تتحلى بالطموح وتغازل النجاح وتعتلى القمة.. واللى مش ممكن.. إنك تتخطى الأساسيات وتتجاوز القواعد وتتعدى على الملكيات وبالتالى تتصف بالطمع.

■ الممكن.. إنك تُغّير وتُطَور وتختصر مراحل وتسابق أزمنة.. واللى مش ممكن.. إنك تلغى الخبرات المتراكمة وتستعين بالمهارات البدائية من باب التحديث.

■ الممكن.. إنك تنام ما تشبعش عافية وتقرأ ما تفهمش حاجة وتشتغل ما تكسبش مليم وتحب ما تكملش ارتباط وتخرج ما تنبسطش وتقعد ما ترتحش.. واللى مش ممكن.. إنك تموت قبل ما تعيش..

■ أنا الممكن ومش ممكن الصعب منى يتمكن.

إخترنا لك

أخبار ذات صلة

0 تعليق